«معايا دكتوراة فيها».. هبة قطب: أتحدث عن المواضيع الزوجية باحترام

كشفت الدكتور هبة قطب استشارى العلاقات الأسرية تفاصيل دراستها الطب فى الإسلام رغم اعتراض الكثيرين على قرارها.
وقالت هبة قطب خلال لقائها مع الإعلامى تامر شلتوت فى برنامج In Deep فى العمق عبر يوتيوب فى شعرة ما بين إنك تتكلم فى المواضيع دى باحترام أو تتكلم فيها بصورة مبتذلة وده مش فضل منى إنى بعرف أحافظ على الحتة دي أنا بدأت أطلع فى التليفزيون من سنة 2000 ولو حد بعتلى وأنا عارفة إن المذيع أو المذيعة دى بيدخلوا فى القصة بمنطقة هزار كنت بعتذر عن البرنامج مع إنى كنت فى مرحلة انتشار وعايزة أتعرف.
وتابعت تخصصت جراحة وكان حلم حياتى إنى أبقى جراحة. واتخطبت وأنا فى خامسة طب واتجوزت فى امتياز ومكنش باين عليا إنى حامل ولما ولدت بنتى الكبيرة دينا كانت مبتنامش ولا أنا كنت بنام وطبعا فشلت أرجع للجراحة الجراحة دى عايزة 10 ساعات فى اليوم حضور وذهن صافى وبيات فى المستشفى فى أيام العمليات طيب أسيب بنتى لمين مش ذنبها إنى أمها.
وتابعت أخذت أصعب قرار فى حياتى ولما حلمى اتحط فى كفة قدام بنتى أصريت إن ذكريات بنتى ميكونش فيها أم تانية غيري لما أقارن ولادى بأى حاجة تانية فى الحياة لأ طبعا مفيش حاجة تتقارن بيهم.
وشرحت أخدت حاجة اسمها وظائف أكاديمية وكنت فى قمة اكتئابى إن حلمى راح وحماتى ربنا يديها الصحة هى اللى خدت ورقى وقدمت لى فى الوظائف الأكاديمية ولما دخلت الطب الشرعى كان لمجرد اللقب ولما بدأت اكتشفت أد إيه هو علم رهيب وحيوي مش تعامل مع الأموات فقط علم واسع جدا وبيهتم بالبشر اللى عايشين أكثر من الميتين.
هبة قطب توجه نصيحة للمرتبطين زوجى أول حب فى حياتى.. راجل فخم
وذكرت هبة قطب خلال لقائها مع الإعلامى تامر شلتوت فى برنامج In Deep فى العمق عبر يوتيوب الثقة والكرامة عندى خلقة ودى عندى من سن 4 سنين وأنا محبتش خالص فى فترة المراهقة كان ورايا مذاكرة كان عندى أنشطة كتير جدا فى أيام الأجازة.
وتابعت أول حب فى حياتى جوزي هو دكتور عيون واتعرفت عليه فى الجامعة مكنتش بطيقه فى أول تعارفنا ولما كنت بضطر أتعامل معاه مكنتش ببقى مبسوطة لأن أنا قيادية وهو قيادي وقعدت 3 سنين مش طايقاه.
واستكملت بعدين طلعنا رحلة والبساط بدأ يبقى أحمدي وشوفنا مواقف فى السفرية دى وركبنا قطر أوروبا كله وكان مليان مواقف كوميدية وبعد ما رجعنا من الرحلة اعترف لى بحبه وقالى أكيد إنتى حاسة إنى بحبك وأنا بحتفل بالذكرى دى كل سنة زى اليوم اللى قالى فيه أنا بحبك واليوم اللى قالى فيه أنا عايز أتجوزك.
وأضافت دى فرصة نقول للناس اللى ترتبطوا بيه لازم تكونوا بتعرفوا تتكلموا معاه وزوجى مستمع جيد ومش كل الرجالة كده ودى حاجة مهمة جدا.
وأتمت زوجى جزء ضخم من نجاحي وطول الوقت بيدعمنى وبيقولى إنتى أحسن واحدة ومين غيرك اللى يعمل كده علاقة من نوع فخيم راجل فخم.